Zv.Ministri i Transporteve, Ylli Manjani, e konsideron reformën territoriale të vonuar dhe këmbëngul që proçesi nuk është politik. Kriteri kyç i kësaj reforme sipas tij është Shqiperia funksionale.
“Kriteri më i përshtatshëm është kriteri i Shqipërisë funksionale. Që do të thotë njerëzit kanë zgjedhur të jetojnë në një vend të caktuar, zgjedhin ose janë të detyruar të zgjedhin vendin ku punojnë, ashtu siç kanë dhe vendin ku marrin shërbimet publike. Pra si ta bëjmë territorin e Shqipërisë sa më funksional që tu shërbejë nevojave të njerëzve” tha ai.
Por për Manjanin reforma territoriale duhet shoqëruar edhe më tkurrje të numrit të ndarjeve rajonale.
“Shqipëria duhet riorganizuar edhe në kuptimin rajonal, pasi 12 qarqe janë shumë. Direktiva, disa direktiva ku më kryesorja është direktiva e ujit të BE, tenton ta akumolojë të gjithë zhvillimin rreth baseneve ujore. Shqipëria sot ka 6 basene të njohura, por nuk ka 12 që të kishim 12 rajone apo qarqe. Ndoshta numri 6, 5, 4 mund të ishte një numër më përfaqësues” u shpreh Zv.Ministri i Transporteve, Ylli Manjani.
Zv.Ministri i Transporteve thotë se opozitës i është lënë çdo hapësirë, por se qendrimi i saj deri tani ka qenë i pasinqertë.
“I mjeri ai faktor politik që merr koston që nuk do ta bëjë këtë reformë” përfundoi Manjani.
