Mashtrimi i radhës i Dr.Boçit

19

per letren30Dr. Matt Hito

Pa hyrë në komente po japim prova dhe fakte që vërtetojnë se Dr. Besim Boçi (zv.Drejtor) i QSUT “Nënë Tereza” në Tiranë me paramendim dhe qëllim “mashtroi” publikun në një emision televiziv, përballë meje dhe publikut. Dihet se emisioni kishte për qëllim (objekt) zbardhjen edhe një herë të së vërtetës për vdekjen e femijës Denis Almadhi në sallën e operacionit në spitalin francez.

Dihet se fëmija hyri në sallën e operacionit për një ndërhyrje në kapakun (qepallën) e syve, operacion që sot kryhet brenda 20-25 minutave  me anestezi lokale. Fëmija qëndroi në sallën e operacionit plot 9-10 orë dhe doli i vdekur, pas shpërthimit të Hypertermisë Maligne (pasojë e ardhur nga lënda narkotike që iu dha fëmijës).  Dr. Boçi deklaroi se: “Mjekët irlandezë kanë ardhur në Shqipëri mbi bazën e një marrëveshjeje me Ministrinë e Shëndetësisë (theksojmë se e njëjta deklaratë është bërë publike dhe nga ish-ministri i Shëndetësisë Vangjel Tavo dhe nga ish-drejtori i Politikave të Shëndetësisë Pëllumb Pipero).

Fakti që në këtë ekip mjekësor ka bërë pjesë dhe mjek që në atë kohë ka qenë në pension, të bind se të gjitha këto “figura” të mjekësisë shqiptare, si dhe deputetë të parlamentit shqiptar, kanë vepruar në kundërshtim me ligjin dhe Kushtetutën e Shqipërisë. Është fakt që mjeku Jack Mc.Cain, duke qenë mjek në pension, ligjërisht nuk ka ushtruar profesionin  e tij si kirurg maxilofacial në Irlandë. Është fakt se mjeku Jack Mçain është mjek dentist dhe si i tillë nuk lejohet ligjërisht të kryejë ndërhyrje plastike në sy.

Dr. Boçi nuk dha asnjë shpjegim pse fëmijës nuk iu bë absolutisht asnjë ekzaminim genetik (absolutisht i domosdoshëm në rastin e fëmijës për të përcaktuar nëse lënda narkotike do të sillte pasoja vdekjeprurëse për fëmijën, po të ishte bërë ky test do të vërtetohej se:  Fëmija absolutisht nuk duhej operuar me narkozë të përgjithshme. Ky ekzaminim nuk u bë, vdekja vërtetoi se mjekët neglizhuan dhe neglizhenca e tyre e çoi fëmijën në vdekje. Dr. Boçi tha se “dentroleni nuk mund të sillej nga mjekët irlandezë, sepse do të quhej kontrabandë!” Pyesim z. Boçi: “Si ka mundësi që në një marrëveshie midis Ministrisë së Shëndetësisë (ministrit) dhe këtyre profesorëve të nderuar ,”Dentroleni ” të sillet kontrabandë!”  Dr.Boçi nuk na thotë kur filloi narkoza, sa zgjati narkoza, në çfarë rruge u dha narkoza? Kur filloi pasoja e parë e hypertermisë maligne? Sa zgjati narkoza pas fillimit të hypertermise maligne? Pra në kartelën e fëmijës nuk kemi asnjë të dhënë “thuhet vetëm fëmija vdiq në orën 19:30”.

*Përfaqësues ligjor i familjes së Denis Almadhit

Gazeta “Shekulli”