Tri vjet pas vrasjeve të 21 janarit, një prej familjarëve të viktimave thotë se autorët janë të lirë. Vëllai i Hekuran Dedës, për vrasjen e të cilit ende nuk është gjetur autori, thotë për GSH se vrasësi është Agim Llupo.
“Vrasësi i vëllait tim është Agim Llupo, ai i mori jetën me plumb vëllait tim të ndjerë. Por, autori i vëllait tim u la i lirë nga gjyqtarët e korruptuar të Sali Berishës. Por, ne presim që drejtësia një ditë të vërë pas hekurave Agim Llupon”.
Deda thotë se si familja e të vëllait, Hekuranit, edhe e tij, janë në gjendje të vështirë ekonomike. Ai shprehet se Hekurani ka lënë pas dy vajza, të cilat nuk marrin asnjë ndihmë sociale, pasi Bashkia e Kamzës nuk i ka ndihmuar.
“Gjendja ekonomike në familjen tonë, si në familjen time, edhe në atë të vëllait, është shumë e rëndë. As familja e vëllait tim, as familja ime, nuk kemi përfituar nga ndihma sociale. Kreu i Bashkisë së Kamzës, – aty ku jetojmë ne dhe kemi dokumentet, – sa herë kemi shkuar për ndihmën ekonomike na ka thënë që nuk na takon, as mua, as familjes së Hekuranit. Në shtëpinë e vëllait tim, përveç dhimbjes, duhet të përballojnë edhe vështirësitë e jetesës”, thotë ai.
