Problemi i golit, i evidentuar në ndeshjet e fundit të Skënderbeut, e ka detyruar trajnerin Mirel Josa që ta “ngujojë” ekipin para portës. Në seancën e djeshme stërvitore, skuadra ka punuar për rreth 60 minuta me goditjet në kuadrat, teksa është kërkuar që të përmirësohet shënjestra e lojtarëve, pasi në ndeshjet e fundit kanë gabuar shumë pranë portës. Këtu nuk futen vetëm sulmuesit, por edhe mesfushorët. Ndryshe nga herët e tjera, trajneri ka vendosur dje ta ndajë ekipin në dy pjesë: mbrojtësit punonin veçmas, ndërsa mesfushorët së bashku me sulmuesit ishin duke u stërvitur me goditjet në kuadrat. Për të perfeksionuar sa më shumë efikasitetin e gjuajtjeve, Josa e ka vendosur ekipin në situata të ndryshme. Fillimisht grupi u përqendrua te krosimet nga krahët dhe më pas goditjet nga distanca në pozicione të ndryshme të fushës. Ndërkaq, që gjatë seancës së djeshme, sidomos në goditjet e kuadratit, stafi teknik ndërpriste stërvitjen dhe jepte këshilla për sulmuesit në veçanti. Këta të fundit deri më tani nuk kanë shënuar aq sa pritet. Bëhet fjalë për Pejiçin, Morinën dhe Ribajn, të cilët kanë qenë titullarë, ndërsa emra si Nimaga e Tahirllari janë aktivizuar pak në këto 12 javë.
Këshillat – Reparti i sulmit ishte ai që ka kërkuar më shumë të gjejë një zgjidhje në stërvitjen e djeshme, duke u munduar që të jenë sa më të saktë në finalizim. Josa vazhdimisht kërkonte nga Pejiç & CO që të mos neglizhonin në goditjen e fundit. “Nuk duhet të neglizhoni për asnjë moment në stërvitje. Edhe këtu duhet të kërkoni që gjithnjë të shënoni gol, pasi nëse toleroni dhe godisni portën me neglizhencë këtu, atëherë e njëjta gjë do të përsëritet edhe në ndeshje. Duhet të jeni të përqendruar”, – u tha Josa lojtarëve gjatë seancës stërvitore. Nga ana tjetër, Pejiç nuk merrte këshilla vetëm nga Josa, por gjatë aksioneve zinxhir edhe nga përgatitësi i portierëve, Ilir Bozhiqi. Kroatit i është kërkuar që të sulmojë gjithmonë në shtyllën e parë, pasi cilësitë e tij i japin më shumë efikasitet në këtë zonë të fushës. “Pero, gjithmonë te shtylla e parë kërko topin, pasi me aftësitë e tua në 70% të rasteve arrin të konkretizosh saktë nga kjo pikë”, – i kërkonte Bozhiqi sulmuesit. Ndërkaq, si zakonisht, ekipi në fund zhvilloi edhe ndeshjen brenda grupit, e cila ishte mjaft e luftuar deri në minutën e fundit.
