21 persona kanë humbur jetën nga një shpërthim në lokal të premten në Kabul. Lajmi bëhet me dije nga mediat afgane. Në mesin e viktimave janë edhe përfaqësuesi i Fondit Monetar Ndërkombëtar në Afganistan dhe katër pjesëtarë të Misionit të Kombeve të Bashkuara.
Sulmi ndodhi në lagjen Akbar Kan, ku ndodhen edhe disa ambasada dhe organizata të huaja. Sulmi ndodhi në mbrëmje kur në restorantin e quajtur “Taverna du Liban” ndodheshin mjaft darkues. Një kamikaz shpërtheu eksplozivin jashtë derës së restorantit shumë të siguruar dhe më pas aty u futën edhe dy persona të armatosur, të cilët u qëlluan për vdekje nga forcat e sigurimit. Talibanët kanë pranuar përgjegjësinë për këtë sulm duke u shprehur se synimi i tyre ishin zyrtarët e huaj.
Sekretari i Përgjithshëm i Kombeve të Bashkuara Ban Ki-moon ka dënuar këtë incident duke nënvizuar se “sulmet ndaj civilëve janë plotësisht të papranueshme dhe paraqesin një shkelje flagrante të ligjeve ndërkombëtare”.
Një zëdhënësi i talebanëve shkroi në ‘Twitter’ se sulmi është shenjë hakmarrje për fushatën ajrore që ka vrarë qindra civilë .
