Ministrja e Integrimit Evropian, Klajda Gjosha, priti sot ambasadorin e Bashkimit Evropian në Shqipëri, Ettore Sequi, me rastin e lënies së detyrës së tij në Shqipëri.
Duke i uruar suksese në detyrën e re, Ministrja Gjosha shprehu keqardhjen për mbylljen e misionit të z. Sequi në vendin tonë. Ajo vlerësoi kontributin e Ambasadorit të BE-së dhe mbështetjen që i ka dhënë Shqipërisë në lidhje me procesin e integrimit.
“Z. Sequi ka luajtur një rol të rëndësishëm dhe ka ndihmuar Shqipërinë, nisur edhe nga fakti që vjen nga një vend mik si Italia. Me profesionalizmin dhe përkushtimin e tij, ai ka qenë gjithmonë në krah të shqiptare, lidhur me axhendën e integrimit”, u shpreh Ministrja Gjosha.
Z. Sequi theksoi se puna në vendin tonë ka qenë një nder i madh për të duke nënvizuar se Shqipëria po ecën me ritme mjaft të mira në rrugëtimin e saj në BE. Ai inkurajoi Ministren për të vijuar punën e saj, si pjesë e qeverisë e cila është angazhuar të përmbushë të gjitha detyrimet e saj. Ambasadori i BE-së, theksoi gjithashtu se edhe në pozicionin e ri do të vijojë të punojë për Shqipërinë.
