Cana: Goli ishte reagim instiktiv

68

canaLorik Cana është heroi më i ri i Lazios. Futbollisti kosovar i dhuroi një fitore të rëndësishme dhe tre pikë ekipit të tij, në transfertën e vështirë në Firenze, ndaj  Fiorentinës. Futbollisti shqiptar shënoi një gol spektakolar në stilin “gërshërë” dhe u bë njeriu i ndeshjes, kur askush s’e priste.

“Në rastin e golit kam reaguar me një instikt të pastër. Në ato situata nuk mund të mendosh shumë”, ka thënë 30 vjeçari pas ndeshjes.

Ai  iu gëzua më shumë fitores së arritur, e cila e ngriti ekipin bardheklatër në vendin e tetë në tabelë me 38 pikë të grumbulluara.

“Kjo fitore na mundëson të shkojmë përpara në rrugëtimin tonë në kampionat. E kishim përballë një skuadër të fortë, por ishim të përqëndruar si duhet gjatë ndeshjes. Kur je në avantazh duhet të qëndrosh i vëmendshëm pasi një kundërshtar si Fiorentina mund të të ndëshkojë. Kemi ende nevojë për shumë përmirësime, pasi në momente të tilla të lojës duhet të synojmë të shënojmë edhe një tjetër gol”, tha futbollisti nga Gjakova.

Ndërsa Cana luajti titullar në Artemio Franchi, portieri kosovar, Etrit Berisha, përfundoi edhe në këtë ndeshje në bankinë, pasi trajneri Edy Reja preferoi më shumë portierin Federico Marchetti.