Një shpërthim i fuqishëm ka ndodhur në mes të qytetit të Vlorës. Nga të dhënat paraprake flitet për një atentat me telekomandë ndaj makinës së kryetarit të komunës Qendër. Policia ka bërë të ditur se, është hedhur në erë makina e kryetarit të komunës qendër në Vlorë, Fredo Berberi. Ky i fundit ka mbetur i plagosur, pasi makina e tij ka shpërthyer teksa ishte në lëvizje.
Në vendin e ngjarjes ka mbërritur policia dhe ambulanca, e cila ka transportuar drejtë Spitalit Rajonal të Vlorës të plagosurin. Momentalisht nuk ka të dhëna rreth gjendjes së tij shëndetësore.
Si pasojë e shpërthimit të fuqishëm, në automjetin tip fuoristradë “Benz ML”, janë dëmtuar edhe dy makina të tjera, që ndodheshin aty pranë në momentin e ngjarjes.
Ekspertë të policisë së Vlorës kanë mbërritur në vendngjarje dhe po punojnë për të zbardhur autorët e vendosjes së lëndës eksplozive në makinën e kreut të komunës Qendër.
Mësohet se pas shpërthimit, makina është përplasur me mjetet që ishin të parkuara në anë të rrugës.
Ndërsa, një grup deputetësh të Partisë Demokratike janë nisur drejt Vlorës, për të vizituar kryekomunarin Fredo Berberi.
