Është prezantuar sot agjencia “Crown Agents” e cila do të ofrojë asistencë në shërbimin doganor.
Në fjalën e tij, kryeministri Edi Rama nënvizoi nevojën urgjente për riformatim dhe ndryshim të rolit të administratës doganore.
“Ajo që dua të nënvizoj është urgjenca që koha e re për ta riformatuar rolin dhe imazhin e institucionit dhe aktorëve të përfshirë në aktivitetin doganor. Koha e re që është vulosur në 1milionë vota për miqëqeverisje nuk pranon institucione të kohës së vjetër të keqqeverisjes.Kushtet mesjetare, si ato të doganës së Durrësit dhe të Hani të Hotit janë mishërimi më turpërues e zhvlerësimit të shtetit, të zhvlerësimit të sipëmarrjes dhe vetë qytetarit dhe të zhvlerësimit të së ardhmes të të gjithë vendit” u shpreh Rama.
Sipas kryeministrit me jetësimin e një bashkëpunimi të gjerë mes qeverisë, miqve dhe tashmë edhe me ndihmën e “Crown Agents”doganat duhet të bëhen pa humbur kohë një instrument financiar me karakter social.
Kryeministri paraqiti edhe disa nga objektivat e qeverisë për doganat që sipas tij brenda 4 viteve do t`i shndërrojnë ato si doganat e vendeve europiane.
“Si pjesë e skuadrës qeveria në bashkëpunim me drejtorinë e doganave do të sigurojë transformimin e mjediseve duke nisur nga puna me ato projekte të munguara që mund të garantojnë gjatë 4 viteve doganat të mos kenë asnjë dallim me pikat doganore të vendeve të Europës, gjithëpërfshirje në vendimmarrje, angazhimin e administratës doganore në projekte kombëtare dhe ndërkombëtare, përfshirje në nisma sociale dhe garantimi i komunikimit të doganave me biznesin” u shpreh Rama.
